كتاب الرأي : اجي تفهم كيف تستخلص الدولة الضرائب من جيب المواطن (في شكل هزلي)

المغربية المستقلة : حسن افرياض

في 2018 مثلا الدولة حلبت من المواطن مبالغ مهمة كلها ضرائب مباشرة يعني تتجيك فسميتك تمشي تخلصها . إما عندك طوموبيل أو دار أو أرض أو شركة أو غيرها .

كاين طريقة أخرى ديال الحلب وهي ضرائب غير مباشرة . يعني الدولة كتفرض ضريبة على شي سلعة والتاجر بطريقة اتوماتيكية تيزيد فتمن ديك السلعة ولي غادي تشريها نتا . داك التمن لي خديتي بيه زايد هداك ضريبة تتمشي لخزينة الدولة وبالتالي ف 2018 دخلت للخزينة مبالغ خيالية وبلا متحس نتا بلي راك خلصتيها

عند بالك صافي سالينا ؟ لا مزال اجي ديك الخلصة لي كتشد فاللخر ديال الشهر واش مندوقوش منها
الدولة تتزيدك ضريبة أخرى على الدخل . أي درهم دخل لجيبك ربحتيه ولا تخلصتيه غادي تعطي عليه ضريبة وبالتالي الخزينة ف 2018 ربحت معاك عدد كبيييييير بزاف ديال الدراهم.

بلاتي فين غادي مزال مشبعناش منك .
باغي تصاوب لاكارط ولا باسبور ولا تگاليزي شي ورقة ؟ خلص معاك التمبر ورسوم التسجيل . وهنا الدولة ربحت معاك 1700 مليار

بلاتي ناس لي جايين من برا ولي تيجيبو السلعة واش نخليوهم فخاطرهم ؟؟!! لا لا خاصهم يتحلبو
هنا كاين الرسوم الجمركية لي دخلت فيها الخزينة العامة 9000 مليار سنتيم فنفس السنة

صحاب المخالفات البروصيات وتفويتات الصفقات العمومية ودخول المرافق العمومية وناس لي كيخصلو الخطية …. تاهوما تيمشيو للخزينة ولي وصلت ل 2200 مليار سنتيم .
وفي الأخير منساوش بلي الدولة عندها بزااااااف ديال المصاريف.